Rewşen Mêrdîn: Tevgera jinê li pişt gelê Êzidî ye

13

Rewşen Mêrdîn bal kişand ser êrişên li ser Şengalê û destnîşan kir, ku bi navê Tevgera Azadiyê ya Jinê ew li pişt civaka Êzidî ne û amade ne wan biparêzin.

Endama Koordînasyona KJK’ê Rewşen Mêrdîn tevlî bernameya taybet a Stêrk TV bû û bersiv da pirsên rojnamevan Zeynep Nergîz.

Rewşen Mêrdîn işaret bi tecrîda li ser Rêberê Gelê Kurd Abdullah Ocalan kir û got, “Serokê me 23 sal in bi rengekî giran tecrîdkirî ye. Dewleta Tirk bi pêkanînên xwe sûc dike, divê bê darizandin. Têkildarî rewşa Serokê me, bêguman ne tenê dewleta Tirk berpirsyar e. Çawa ku di dîlgirtina Serokê me de destê dewletên Ewropayê heye, di tecrîdkirinê de jî xwedî heman berpirsyariyê ne. Biryara Konseya Ewropayê ya li ser Serokê me, her çiqasî dereng jî be, erênî ye. Lê divê şopdarê biryara xwe be.”

Rewşen Mêrdîn diyar kir ku tecrîda heyî bandorê li siyaset û civakê jî dike û destnîşan kir, ku dermanê krîza aborî, siyasî û rêveberiyê ya li Tirkiyeyê, paradîgmaya Rêberê Gelê Kurd Abdullah Ocalan e. Rewşen Mêrdîn got, “Heta ku tecrîd neyê şikandin û Rêber Apo azad nebe, ew krîz ji holê ranabe û wê hîn kûrtir bibe.”

Rewşen Mêrdîn destnîşan kir ku tevgera jinê wê têkoşîna xwe ya ji bo azadiya Rêberê Gelê Kurd Abdullah Ocalan mezintir bikin.

Rewşen Mêrdîn bi dewamî bal kişand ser êrişên li ser zindaniyan û got, “Hikumeta AKP’ê ji dema ku hatiye ser desthilatdariyê û vir ve li dijî zindaniyan pêkanînên taybet dike. Kesên ku zerarê didin civakê, mafya, diz û hemû ji girtîgehan derxistin. Kesên ku fikrên xwe azad anîne ziman û li dijî hikumeta heyî muxalîf hemûyan dadgeh dikin. Girtiyên siyasî gelek ji wan cezayên xwe kişandine û pêwîste bêne berdan. Lê belê yên ku li dijî wan serî rakirine teslîmkariyê li wan ferz dike. Eger qebûl jî nekin bi pêkanînên fazîşan re rû bi rû tên.”

Rewşen Mêrdîn diyar kir ku êrişa li ser Garîbe Gezer ji aliyê dewletê ve bi zanebûn hatiye kirin û dewleta faşîst wê hesabê vê bide.

Rewşen Mêrdîn got, “Ev sê meh in li ser Garîbe Gezer êşkence hatibû girankirin. Bi rêya malbata xwe anîbû ziman ku destavêtin, destdirêjî û bêrûmetî lê hatiye kirin. Garîbe Gezer xwedî berxwedan û têkoşîneke bi rûmet bû. Ji ber ku serî netewand ji hêla faşîzmê ve bi hovane hate qetilkirin.”

Rewşen Mêrdîn destnîşan kir ku divê gel, bi taybetî jî jin xwedî li têkoşîn û berxwedana Garîbe Gezer derkeve û got, “Gelê me û jinên azadîxwaz divê xwedî li têkoşîna Garîbe Gezer derkevin. Em sekna dayika Garîbe bi rûmet dibînin. Pêwîste her dayikek Kurd bi vê helwestê tevbigere. Yên ku herî zêde di vî şerî de dilê wan şewitiye dayik e. Eger dayik hemû destê xwe bidin hev û li dijî vê faşîzmê xwedî sekn bin wê faşîzma AKP’ê têk bibin.”

Rewşen Mêrdîn ragihand ku tevgera jinê wê hesabê Garîbe Gezer bipirsin û got, “Bi sedan pêşengên jinê di nava çar dîwaran de ne. Û dîlgirtî ne. Ti sûcê wan nîne. Tenê ji ber ku azadî xwestine hatine girtin. Garîbe Gezer jî yek ji wan bû. Berpirsyarê qetilkirina Garîbe Gezer wezîrê karên hundir e. Û wê hesabê qetilkirina Garîbe bide. Weke tevgera jinê heta dawî wê xwedî li têkoşîna Garîbe Gezer derikevin. Em bang li jinan dikin ku li dijî vê komkujiyê xwedî li sekn û çalakiyê derkevin.”

Endama Koordînasyona KJK’ê têkildarî êrişên li ser Şengalê jî wiha axivî: “Ez destpêkê ji bo malbata Şehîd Merwan Bedel Xwedêda re sersaxiyê dixwazin. Merwan Bedel kesekî ku li dijî DAÎŞ’ê şer kiribû, civaka xwe ji qirkirinê xilas kiribû. Dîsa li ser meclîsa gel êriş çêbû. Êrişên li ser Şengalê bi destê faşîzma AKP’ê û xiyaneta PDK’ê hate kirin. Eger ne PDK be, AKP nikare êrişeke bi vî rengî pêk bîne. Di heman demê de PDK’ê jî hikumeta Iraqê jî ev civak bi qirkirinê re rû bi rû hiştibû. Îro jî gelê me ku dixwaze xwe biparêze qir dike. Hikumeta Iraqê jî PDK jî li hemberî civaka Êzidî sûc kirine, divê hesab bidin. Ne ji PDK’ê bûya Êzidî nedihate qirkirin, jinên Êzidî li sûkan nedihatin firotin. Ev jî tê wê wateyê ku ew bi DAÎŞ’ê re hevkar in. PKK’ê ji xwe re dikin bahane û li gelê Êzidî didin. Ew bi xwe jî zanin ku PKK bi rengekî fermî ji Şengalê derketiye. Yen ku êriş li dijî wan tê kirin Êzidî bi xwe ne. Êzidî dixwazin xwe bi xwe bi rê ve bibin.”

Rewşen Mêrdîn di dawiya axaftina xwe de destnîşan kir ku ew weke tevgera jinê amade ne parastina civaka Êzidî bikin û got, gelê Êzidî çi biryarê bide ew li pişta wan e.